Responsive image

Curro nou ‘nóg meer gesog’

Curro Hermanus

 

Die private onderwysgroep Curro het vir die soveelste jaar ʼn groei in leerdergetalle én winste getoon. Dit wil boonop voorkom of leerdergetalle en inkomste jaarliks teen ʼn vinniger koers groei, ten spyte daarvan dat die Covid-19-pandemie baie Suid-Afrikaners in ʼn finansiële verknorsing gedompel het.

Die groep het Woensdag sy finansiële resultate vir die jaareinde 31 Desember 2021 bekendgemaak.

Hiervolgens het die gemiddelde getal jaarlikse leerders sedert 2020 met 9%, van 60 777 tot 66 447, toegeneem. Dit is meer as die 6% waarmee die getal leerders tussen 2019 en 2020 toegeneem het. Curro het die afgelope jaar boonop net een skool bygekry, teenoor die 11 nuwe skole wat tussen 2019 en 2020 tot die groep bygevoeg is.

Teen 18 Februarie het 70 408 nuwe leerders reeds vanjaar by die skool ingeskryf, ʼn 6% toename teenoor dieselfde tyd verlede jaar. Dit is bo en behalwe die 1 169 leerders wat by Curro se nuwe HeronBridge College begin het.

“Sedert 2017 sien ons jaarliks ʼn groei van tussen 6% en 12% in leerdergetalle. Sedert die begin van die Covid-19-pandemie wil dit voorkom of ons skole selfs meer gesog as voorheen is,” het Andries Greyling, uitvoerende hoof van Curro Holdings, aan Maroela Media gesê. Hy meen die kleiner klaskamers en gehalte-onderrig wat leerders kry, is die rede vir die deurlopende groei.

Nietemin sê Greyling privaatonderwysinstellings kan nooit openbare skole heeltemal vervang nie en dat die openbare en privaatsektor saam moet werk om ʼn werkbare oplossing vir gehalte-onderwys in Suid-Afrika te bied.

Greyling sê daar is wel leerders wat jaarliks Curro se skole vir ʼn ander skool verlaat, onder meer omdat ouers nie meer die skoolfonds kan betaal nie. “Ons weet dat die koste van onderwys in die Suid-Afrikaanse konteks ʼn uitdaging kan wees. Ons probeer ouers tegemoet kom deur verskillende onderrigmodelle wat verskillende kosteopsies bied,” sê Greyling.

Die groep het verlede jaar ʼn wins van R3,5 miljard getoon. Dit is ʼn 15% toename in die R3 miljard wins wat die groep in 2020 gemaak het. Dit is ʼn heelwat groter groei in wins as die jaar tevore, toe wins met 5% van R2,9 miljard in 2019 tot R3 miljard in 2020 toegeneem het. Die inkomste uit skoolgeld wat gehef is, het ook verlede jaar met 11,8% toegeneem teenoor 2020. Agterstallige skoolfondse wat afgeskryf is as slegte skuld was ook minder (R131 miljoen) as in 2020 (146 miljoen).

Greyling sê hy hoop leerders kan vanjaar ʼn meer gebalanseerde skooljaar beleef en dat hulle sal kan deelneem aan die reeks buitemuurse aktiwiteite wat Curro-skole aanbied.

 

Lees die volle artikel hier: Curro nou ‘nóg meer gesog’ | Maroela Media